Parampuan di Mato Cadiak Pandai

Maklumlah si upiak anak gadih nan surang nan kamanarimo pusako jo rumah gadang , kasado rangsanakno laki-laki 3 urang, jadi si gadih iyo bana diarokakkan bana ka jadi bijo baiak rumpun kakambang. Dengan status gadih nan indak barangsanak padusi, iyo agak balabiah sayang mande ka paja ko, sakin sayangno satiok nan kadi kakok mande salalu disabuikan untuak si gadih.

Ikolah pasan mande ka si gadih :

Ketahuilah nak !! Adopun urang cadiak pandai mambagi parampuan ko kapado ampek jinih, nan partamu parampuan barau-barau, nan kaduo parampuan layang-layang, nan katigo parampuan lawah-lawah dan nan kaampek parampuan ramo-ramo.

Parampuan barau-barau adolah parampuan nan ilia basorak mudiak basorai, patang pagi gilo bakicau, sasaklah rmbo dibuekno. Itulah misa jo umpamono nak : padusi indak punyo jakun mangecekan nan apo tapikian bukanno bapikia untuak mangece, patandang batabua gunjiang, aik urang di kaka, malu kawan disingkok-singkok, rasio laki disingikkan, bingik jo dangkih, asuang jo pitanah, maupek jo mancaci jadi pamenan bibia tiok hari. Nan elok ba kaburuak, tagajai dijongkekkanno. Sahinggo bumi manyumpah , langik mangutuak. Itulah parampuan cilako. Jauahkan bana sipaek supo iko oi anak kanduang.

Nan dikatokan parampuan layang-layang : Layang kian layok kamari, maradai bapalun awan, babega manyonsong angin, suko manukiak dinanrami, mainno diateh ateh, kecekno maninggi taruih, indak ado nan gagah dari no, urang lain di anggap tungau sajo. Itulah padusi nan mati karancak an, suko malala jo mangirai, singgah sinan mampia kamari, lupo jo kawajiban rumah tanggo, cayah layanan ka suami, ratak lah nyato baparinggo, mananti pacahno sajo lai.

Baa pulo nan dikatokan parampuan lawah-lawah :

Mambuek sarang elok rupo , batarawang bajalin rapek, basulam suji samo jarang , haluih bak babanang suto ( sutra) , tapi katuhilah : nan lahia no sarang tarantang , di bathin jarek nan tarantang, manggatah tiok urang lalu. Kok sasek sipatuang singgah, tapasah bilalang inggok , ano bagageh maniayo, niak salah parangai jaek, manyasok darah dalam dagiang, mancucuik isi utak banak, lah jadi bangkai di tinggakanno. Itulah parampuan paling hino, bantuak rancak tutuano lamak, baso elok paramah pulo tapi pangana nyato nak mangaruak dompet nan jantan sajo, manyamun jo marampok jo suduik mato, manepok jo galak manih, iko namono parampuan tukang pangua, semba kida raiah kasuwok, tamak sarato lobo , rakuih sarakah pulo, suko magicuah ka laki, dunsanak diumbuak-umbuak dek karano barado, mato duitan rang katokan , cewek matre istilah kini, malutajua dek karano pitih.

Pantangkan bana sipaek supo iko oi gadih, didunia hino , di akhirat masuak narako.

A iko adolah pangabisan , nan ka ampek parampuan ramo-ramo.

Adopun satantangan parampuan ramo-ramo, badan sariang rancak bamego, sayok baukia baliak balah, lunak lambuik sajuak baok an , lahia segeh bathinpun manih ,  maso kalua bakutiko, tabangno magak-agak, bapantang kamari inggok , antah katangkai bungo sajo, gadang ketek suko mamandang, tuo mudo sanang mancaliak , badoso siya nan manggaduah, kok kunun kamancakau kapamenan, luruih pai luruih pulang, tajago budi jo martabat, tiduano bakalang adat, tagakno batumpu undang, bajalan batungkek syarak / ugamo, taat setia kasuami, hormat santun kaibu bapak, pandai bagaua samo gadang, tapuji dek ipa bisan, tapakai dimayarakat,

Nan kanduang oi, iko sipaek nan kadi pakai , lakeklah tuah kamuliaan , parampuan babudi luhur rang katokan, bumi sanang langik mamuji.

Ikolah pasan mande ka siupiak gadih surang. Paralu di ingek dek kalian nan jantan, ka jadi pasan ka anak-anak gadih kalian dikamudian hari.

Wakatu mande alah marambah patang , ikolah nan bisa mandeh pasankan.

@http://groups.yahoo.com/group/palanta87/message/1684