Lah banyak camin nan kabua , contoh nan sudah dinagari “
ulah iduik indak maniru ka nan baiak, sisiak cilako nan tapakai, awaklah inggok
bak binalu, taseso limau dek parangai.
Manuruik urang candiak pandai, nan bapandang laweh jo aka,
balubuak dalam jo budi, adopun sumando tabagi ampek , ciek nan kadipakai nan
tigo buang jauah-jauah :
Partamo sumandi kacang miang.
Nan dikatokan
sumando kacang miang : manyeso di rumah gadang, manggata ka ipa bisan , banang
tarantang diputuihno , nan kusuik di enjo-enjo, aia taganang dikatuahno, nan
karuah dikundak-kundak, sakandang tapi indak sabaun, jomintuo indak baelok, jo
pambayan mamusuah bathin , mamak rumah diupek juo.
Pantangkan bana tu buyuang, sumando cilako tu namono.
Nan kaduo
sumando langau hijau.
Tabang hilia hinggok kamudiak, gilo kawin gilo babini,
bajando satiok liku, anak baserak babilang kampuang. Ikolah sipaek sumando
langau hijau, sipaek tacacek kama pa i.
Nan katigo
sumando lapiak buruak.
Caliaklah nasip lapiak buruak , takirai pasa biaso , talangkahi
indak mamba a, masak lanyau kiliran kaki, namun inyo dilantai juo. Aratino :
Gilo mauli anak bini, bak ayam tajarek jangkia, manjadi kutu rumah gadang,
dunsanak indak tasilau , kamanakan haram tabimbiang, urang kampuang dibaok
lengah, singkek kato baparam sajo dalam biliak, induik manompang kapusako,
paisok mintak kabini, anak batambah banyak juo. Jan ditiru sipaek lapiak
buruak, randah bana martabat dibuekno.
Nan ka ampek
sumando niniak mamak.
Adopun sumando niniak mamak , ka kawan urang ba iyo, kusuik
sato manyalasaikan, karuah sato manjaniahkan, kato sapatah ber-makna, bak lampu
ditangah rumah nan mancahayo lapeh kahalaman, mambieh kasubarang, taranglah
kampuang sakuliliang.
Ikolah sumando nan sabana sumando, katanaman bijo baiak,
kurang ano mauleh, lamah ano mambilai, rajin malateh jo manaruko, sagalo
ditanam sagalo jadi. Sumando niniak mamak sumando tuladan namono.
@http://groups.yahoo.com/group/palanta87/message/1671
No comments:
Post a Comment